Uppskrift að Tækniseiglu fyrir þitt efni
Þú fyllir út átta reiti um efnið þitt, límir kvaðninguna í gervigreindartól og færð drög að verkefni með sömu þremur skrefum og einingarnar: mannlega akkerið, vélræna uppbrotið og ábyrgðarskjalið.
Staða
Frumgerð. Kvaðningin hefur verið prófuð á tveimur efnum, Laxdælu og rafsuðu. Svarlykill sýnidæmisins er enn óyfirlesinn af kennara í faginu, og þess vegna ber þér að lesa sannprófunarlistann áður en nemandi sér nokkuð.
Þrjár reglur sem kvaðningin ber
- Það sem gervigreindin skrifar fyrir þig er drög, aldrei niðurstaða. Hún skilar sannprófunarlista handa þér og þú staðfestir hann.
- Mannlega akkerið má ekki vera hægt að leysa með tóli. Það kallar á reynslu, hlut, stað eða minningu nemandans.
- Ekkert skref krefst greiddrar áskriftar né persónuupplýsinga um aðra. Nemandi rannsakar sjálfan sig eða opinberan aðila.
1. Fylltu út eyðublaðið
Reitur 6 skiptir mestu: þú veist hvar tól fara rangt með þitt efni. Reitur 8 er heimildin sem þú átt í hendi. Villurnar í sýnidæminu mega aðeins hvíla á henni, svo svarlykillinn byggist ekki á minni vélarinnar.
1. EFNI: [t.d. jarðskjálftar á Íslandi · Laxdæla · sjóðir og vextir]
2. HÓPUR: [skólastig, braut, fjöldi, hvað þau kunna fyrir]
3. TÍMI: [kennslustundir + heimavinna]
4. HÆFNI: [hvað á nemandinn að geta eftir verkefnið, 1 til 3 atriði]
5. TÓL Í BOÐI: [ókeypis tól sem skólinn leyfir, með eða án vefleitar]
6. HVAR VÉLIN BRÝST: [hvað veit ég að tól fer rangt með í þessu efni?]
7. EKKI Í BOÐI: [efni eða dæmi sem eiga ekki heima, t.d. nemendur sjálfir]
8. HEIMILD Í HENDI: [bók, handbók, staðall, gögn: það sem kennarinn á og getur flett í.
Límdu inn textabrotin eða nefndu útgáfu, kafla og blaðsíðu.]2. Límdu kvaðninguna í tól
Settu útfyllt eyðublaðið í staðinn fyrir línuna í CONTEXT og sendu allt saman. Ókeypis tól duga. Kvaðningin er á íslensku og biður um íslenskt svar.
INTENT:
Þú ert að hanna kennsluverkefni í sniði Tækniseiglu, íslensks námsefnis í
gervigreindarlæsi. Kjarninn er þrjú skref: (1) mannlega akkerið, þar sem nemandinn
vinnur án vélar úr eigin reynslu; (2) vélræna uppbrotið, þar sem nemandinn notar
gervigreind sem magnara og flokkar niðurstöðuna eftir trausti; (3) ábyrgðarskjalið,
þar sem nemandinn skráir hvað vélin gerði, hvað var sannreynt, hvað var hafnað og
hvað hann ákveður sjálfur. Nemandinn ber ábyrgðina, ekki vélin.
Efnið er það sem kennarinn gefur upp í eyðublaðinu hér að neðan.
CONTEXT:
[EYÐUBLAÐIÐ, reitir 1 til 7, útfyllt]
CONSTRAINTS:
- Skrifaðu á íslensku. Ekki nota „AI“ ber, ekki „prompt“ án skýringar; segðu
„gervigreind“ og „kvaðning (e. *prompt*)“ við fyrstu birtingu.
- Mannlega akkerið: 600 til 1.000 orð. Það verður að krefjast reynslu, hlutar,
staðar eða minningar sem nemandinn hefur og tól getur ekki sótt tilbúið. Skrifaðu
í einni setningu af hverju tól getur EKKI leyst þetta skref.
- Vélræna uppbrotið: skrifaðu kvaðningu handa NEMANDANUM í ICCRA-formi (INTENT,
CONTEXT, CONSTRAINTS, AUTHORITY, REPORTING). Hún á að krefjast þess að tólið
flokki hverja fullyrðingu í þrjú sönnunarþrep (óháð staðfest, sjálf-heimild,
óvíst), aðgreini samhljóm frá staðfestingu og skili sérkafla um það sem það er
óvisst um (andóf gegn smjaðri, e. *sycophancy*).
- Ábyrgðarskjalið: sniðmát þar sem nemandinn skráir aðgerðir vélarinnar, hvað var
sannreynt og hvernig, hvað var hafnað og af hverju, og hvaða ákvörðun er hans.
- Sýnidæmi: skrifaðu eitt dæmi um svar tóls við kvaðningunni í skrefi 2 og feldu í
því þrjár viljandi villur sem nemandi á að finna. Hver villa á að vera trúverðug
og tengjast reit 6 í eyðublaðinu. Skráðu villurnar og hvernig þær finnast í
kennaraleiðbeiningum, aldrei í nemendaefni.
- Villurnar og lausnir þeirra mega AÐEINS hvíla á reit 8 (heimildinni sem kennarinn
lagði fram) eða á röksemd sem þarf enga utanaðkomandi staðreynd (alhæfing, ómæld
tala sett fram sem mæld, listi sem vantar á). Þú mátt ekki smíða villu úr
staðreynd sem þú manst: þá er svarlykillinn sjálfur ósannreyndur. Sé reitur 8
tómur, notaðu aðeins villur af seinni gerðinni.
- Nefndu aldrei kaflanúmer, blaðsíður, nöfn á höfundum, tölur, staðla né vefslóðir
nema þær standi í reit 8. Annars skrifarðu „[KENNARI SANNREYNIR: ...]“.
- Engin skref mega krefjast greiddrar áskriftar. Engin skref mega krefjast
persónuupplýsinga um annað fólk en nemandann sjálfan eða opinberan aðila.
- Ekki nota þankastrik í meginmáli nema nauðsyn krefji. Íslenskar gæsalappir:
„svona“.
AUTHORITY:
Þú mátt velja kjarnaspurningu, dæmi og röð skrefa. Þú mátt EKKI finna upp heimildir,
tölur, tilvitnanir eða rannsóknir. Ef verkefnið þarf heimild sem þú getur ekki
nefnt með vissu, skrifaðu „[KENNARI SANNREYNIR: ...]“ á staðinn.
REPORTING:
Skilaðu í þessari röð, hvert með fyrirsögn:
1. Kjarnaspurning og námsmarkmið (3 til 5).
2. Skref 1: mannlega akkerið (nemendatexti).
3. Skref 2: vélræna uppbrotið (nemendatexti með kvaðningu).
4. Skref 3: ábyrgðarskjalið (sniðmát).
5. Kennaraleiðbeiningar: tími, tól, undirbúningur, viljandi villurnar þrjár með
lausn, og hvar nemendur festast venjulega.
6. Matsviðmið: fjórir mælanlegir liðir sem meta dómgreind nemandans, ekki gæði
textans frá vélinni.
7. Sannprófunarlisti kennarans: allt sem þú sagðir með fullri vissu og kennarinn
verður að staðfesta, allt sem þú ert óviss um, og hverja setningu merkta
„[KENNARI SANNREYNIR]“ sem þú skrifaðir.
8. Prófsteinninn: svaraðu af hreinskilni hvort eitthvert skref í pakkanum færir
ábyrgð frá nemandanum til vélarinnar, og hvar.3. Lestu niðurstöðuna í réttri röð
- Lestu liði 7 og 8 fyrst, áður en þú lest verkefnið.
- Staðfestu hverja merkta setningu gegn heimild sem þú treystir.
- Prófaðu viljandi villurnar sjálf(ur): finnur þú allar þrjár í sýnidæminu? Ef ekki, biddu tólið um nýjar.
- Keyrðu kvaðningu skrefs 2 í ókeypis tóli og berðu útkomuna saman við sýnidæmið.
- Fyrst þá fer pakkinn til nemenda.
Viltu hjálpa til?
Ef þú prófar kvaðninguna á þínu efni og vilt segja okkur hvernig fór, eða lesa yfir svarlykil í þinni grein, þá viljum við heyra í þér.